top of page
Search

CASDT Garante Liu Barreira 4%, Isac : “Jovens Mak Agora & Futuru”


Presidente Interino Partidu CASDT Isac do Rosário, iha Knaar Fatin, Aimutin

DÍLI - Iha ámbitru talk show ho Presidente Interino Partidu Centro Acção Social Democrata Timorense (CASDT) Isac do Rosário deklara CASDT garante sei hetan vitória iha eleisaun Parlamentar 2023, tanba haree husi servisu ne’ebe estrutura baze halo durante ne’e. Presidente Interino ne’e haktuir, partidu CASDT iha ninia vizaun atinje Timor Leste ne’ebe unidade, justisa no solidariedade.

“Ami mai ho vizaun Atinje Timor Leste ne’ebe Unidade, Justisa no Solidariedade, justisa katak hatudu lei ne’ebe los no justu ba sidadaun hotu, unidade katak partidu rasik liga ba ita nia povu sira tenke iha unidade bainhira ita moris hanesan ema sidadaun ida no liu husi partidu ita tenke iha unidade no solidariedade nune’e bele hare dezenvolvimentu ne’e ba oin tuir estatutu CASDT nian”. Tenik Presidente Interino Partidu CASDT Isac do Rosário iha Knaar Fatin, Aimutin, 24/03/2023.

Partidu CASDT hakarak konkore iha eleisaun tinan ida ne’e tanba garante katak ho servisu makaas husi estrutura baze to’o nasionál nian, nune’e CASDT sei hetan vitória iha eleisaun parlamentar 2023.

“Partidu CASDT iha programa liu husi partidu nia hanoin diak ba nasaun ho vizaun no missaun ne’ebe klaru, ho rekusu umanu no matenek ne’ebe diak hodi kompete hasoru partidu sira seluk, nune’e bele lori aspirasaun, opiniaun no sujestaun povu nian ba makaer ukun sira hodi solusiona, ho servisu estrutura tomak nian, ami garante sei liu barreira no tama ba Parlamentu Nasionál, Ita mak agora, ita mak futuru, joven mak agora no joven mak futuru”. Nia garante

Nia akresenta, Wainhira Partidu CASDT manan sei asegura no kontrolu ne’ebe maksimu ba Tasi Timor ne’ebe nakonu ho rikusoin povu nian, maibe infelizmente peska ilegal sira kontinua na’ok rekursu sira iha tasi laran.

Nia saleinta, CASDT mos haree katak presiza prioritiza setor edukasaun hodi halo ema sai matenek ho kualidade, desenvolve setor turizmu hodi dada turista sira husi rai-liur mai rai-laran, desenvolve setor agrikultura hodi hasa’e produsaun nune’e bele hamenuz taxa importasaun husi rai-laran no desenvolve setor saúde ho adekuadu para bele halo asisténsia médiku ba populasaun sira ho diak no bele garante moris naruk ba sidadaun sira.

Enkuantu, Presidente Interino CASDT ne’e mos husu estrutura baze hodi servisu makaas hodi fo vitória ba CASDT, nune’e mos nia husu ba povu Timor Leste hodi vota ho matenek, hili CASDT hodi lori futuru ne’ebe diak ba ema hotu.


Sita husi SAP News jornalista John Marito

Comments


bottom of page