Tan sa mak Centro ASDT?

Iha tempu prosesu luta ba auto-determinação, no libertasaun atu ukun rasik-aan, pensamentu Sosial Demokratiku Timorense (SDT) sai inspirador nudar hanoin ne'ebe atu fo liberdade integral ba ema no povu Timor Oan tomak atu moris ho dignidade hanesan nação independente. Pionerus SDT hanesan Saudoso Fransisco Xavier do Amaral, Saudoso Nicolau Lobato no seluk, kaer ba hanoin SDT nian hodi promove luta ba libertasaun Timor Oan hotu husi kolonialismo no okupasaun estranjeira ba ita nia patria no nação Timor-Leste atu harii sosiedade ida ne'ebe verdadeiramente livre no nakloke. Tamba nee mak ideolojia no filozofia SDT nudar hanoin ne'ebe husi hun kedas mosu wainhira Timor Oan sira deklara atu liberta an husi kolonialismo, opresaun, no nakukun, no mos okupasaun estranjeira.

Partido Centro ASDT inspira aan husi hanoin ou filozofia libertasaun ida ne'e hodi hamosu partido ida nudar Centro atu halao Ação no intervensaun konkreta ba mudansa moris povu nian iha aspetu espritual no material hodi bele harii sosiedade Timorense ne'ebe modernu no prosperu.

Herança istorico ne'ebe pionerus no heris libertasaun nian husik hela mai ita, Centro ASDT kaer ho orgulhu no honra tuir valores ne'ebe orienta Timor Oan hotu nia hanoin atu moris iha Unidade, Justiça, Solidariedade para bele hetan moris diak ne'ebe modernu no prosperu maibe mos justo no solidaria ho respeitu ba realidade kultural povu Timor-Leste nian.

Partido Centro ASDT, nakfilak atu valoriza, fo respeitu ba Saudozus hirak hotu ne'ebe sakrifika sira nian moris, ne'ebe sira hotu, tantu husi Frente Armada, Frente Klandestina, no Frente Diplomata. Fo mos honra ba kontribusaun ba rezistensia/luta/funu, ne'ebe jovens sira halo, inklui Jovens barak nebe halibur-an iha Organizasaun hanesan UNETIM, LESVALT, OPJT, OPMT, OBJELATIL, OJETIL, IMPETTU (IMPETO), RENETIL, nune'e mos Jovens barak ne'ebe sakrifika an iha insidente masakre 12 de Novembru de 1991 Semiteriu Santa Cruz.