top of page
Search

Bainhira Hetan Fiar, CASDT Foka Liu Ba Setor Produtivu

Updated: May 12, 2023


DÍLI – Sekretariu Jeral partidu Centro Acção Social-Democrata Timorense (CASDT), Gally Soares Araujo hatete, se iha eleisaun parlamentar ne'e mak CASDT hakat liu bareira no hetan konfiansa atu hola parte iha ukun hodi asumi kargu ruma iha governasaun, CASDT sei foka ba ministeriu sai hun ba setor produtivu, tanba setor produtivu mak sai hun ba alternativa ekonomia rai laran.

“Em primeriu lugar iha ministeriu saida deit mak ami hetan, fiar karik ami hakarak foku liu ba ministeriu neebe sai hun ba setor produtivu, tanba ami fiar katak setor produtivu mak bele kria alternativa ekonomika ba ita nia rai nomos futuru nasaun nian,” dehan Sekretariu Jeral Partido CASDT Gally Soares Araujo ba STL iha, kafetaria Cafe Uut, Palapasu, Dili, Segunda ne'e (3/4/2023).

Tuir Gally, espetativa CASDT nian mak hakarak fanun joven sira ne'ebe mak durante ne,e deskonte ho situasaun politika atual nasaun nian, mai hamutuk ho CASDT lori Timor ne'e ba oin.

“Ami sira ne'ebe mak oras ne'e daudaun hamutuk iha CASDT, tanba ami hakarak kria alternativa ba joven sira nomos inan aman sira ne'ebe durante ne'e senti katak, jerasaun tuir mai labele lori todan boot liu ne'ebe daudaun ne'e ita lori, tanba ne'e mak ami dehan katak tenki kria alternativa ida hodi lori Timor ba oin hahu ohin no ba futuru,” hatete Gally.

Sekjer CASDT ne'e afirma, preparasaun CASDT nian lao tuir rekezitus ne'ebe maka determina husi governu ne'ebe promulga husi Prezidenti da Republika konaba data no kalendariu eleisaun.

Nia relata, preparasaun balun Iha baze dadaun ne'e lao hela, apezar iha difikuldade balun,estrutura husi nasional to ba nivel sira iha baze kontinua halao preparasaun.

Sekjer CASDT ne'e afirma, CASDT nia observasaun iha tinan 20 nia laran, jestaun administrasaun publika falha total, aleinde tinan-tinan gasta osan boot maibe retornu la iha.

“Tuir ami nia observasaun durante 20 anos ne'e ami hare katak, failha boot ne'e iha jestaun administrasaun publika, tanba administrasaun publika ita boot sira “media” hare katak tinan-tinan ita gasta osan lubuk ida mais ita la iha retornu ekonomiku,” nia tenik.

Nia hatete, governu labele garantia deit ba setor petroliferu, tanba ne'e husu ba governu atu halo investimentu mos ba setor produtivu sira seluk, hodi tau atensaun ne'ebe masimu.

Iha biban ne'e mos Sekretariu Jeral CASDT ne'e mos, hato mensajen ba kamada joven sira inklui inan aman sira ne'ebe akompania sira nia oan iha nasaun ne'e, tempu ona hamrik ho pensamentu rasik ho kreatividade rasik no ho kreatividade rasik hodi hanoin ba futuru ida ne'ebe diak liu.

“Hau nia mensajen ba kamada joven sira ba inan, aman sira ne'ebe maka durante akompania nia oan sira iha nasaun ida ne'e, hau hato'o mensajen simples deit katak, tempu ona foin-sae sira hamrik ho uma rasik tempu ona foin sae sira hamrik ho pensamentu rasik ho kreatividade rasik no ho kreatividade rasik hanoin ba futuru tanba ita nia inan aman sira oras ne'e katuas ba dadauk, ita labele hein sira mate maka ita hamrik, ita tenke hamrik ona agora, tenki hanoin alternativa ba futuru ida diak liu,” tenik nia.

Sita husi STL News

Comments


bottom of page