Partidu La’o Ho Ambisaun Ba Pozisaun No La Iha Domin No Fuan Se La Hamaran Povu Nian Matan Been

Konselleira CASDT Sra. Aida Osorio Soares hamutuk ho estrutura postu adm. Laclubar iha "Uma Kabuar" Sede CASDT postu adm. Laclubar.

MANATUTO - Konselleira partidu Centro Acção Social-Democrata Timorense (CASDT) Sra. Aida Osorio Soares hateten, "Kualkér partidu hotu, hala’o atividade partidu ho deit ambisaun ba pozisaun, la ho fuan la iha domin se la haree hetan povu ki’ik sira, tanba ambisaun ba pozisaun mak na’ok buat hotu hodi haluha povu". Konsileira akresenta tan katak, karik povu fo fiar ba Centro ASDT, iha Eleisaun Parlamentár, ne’ebe sei akontese iha tinan 2023-2027 sei la iha interese privado ka ambisaun ba pozisaun, maibe fo tempu ba foin-sa’e sira, ne’ebe matenek ho karakter ne’ebe la’o ho fuan nakonu ho domin no lia lo’os hodi haree ba interese nasionál no ba povu. Tanba ne'e husu ba foin-sa'e sira mai ita hamutuk lori CASDT ba futuru, jerasaun ba jerasaun tuir ita nia moto katak “Ita Mak Agora, Ita Mak Futuru”. Lia hirak ne’e fó sai bainhira hasoru malu ho militante partidu Centro ASDT sira iha postu adminitrativu Laclubar hodi hametin estrutura postu to’o nivel aldeia iha loron Domingu, 27 Marsu 2022.

Konselleira hamutuk ho membru Mulher Social-Democrata Timorense Laclubar.

Iha fatin ne’e mos lideransa Centro ASDT hateten ba militante sira, tinan barak ona ita fo fiar ba kór polítika balun ne’ebe ukun ona durante tinan barak maibe la valoriza fiar ne’ebe durante povu fo ba sira. Tanba ne’e husu ba belun sira nu'udar jerasaun foun ka foin-sae iha rai domin ne’e, mai ita hamutuk servisu maka’as lori partidu Centro ASDT hanesan partidu foin-sa'e sira nian, hodi hatutan povu sira nia lian iha parlamentu hodi kria estadu ida "Kria duni husi povu, tuir povu nia hanoin no ba povu rasik".

Belun Isac do Rosario fó orientasaun ba estrutura postu Laclubar sira.

Komisáriu politika CASDT Sr. Isac do Rosario esplika ema ne'ebe tama ona iha partido CASDT, tenke sai hanesan nain ba partidu nee rasik labele sai fali bainaka ba ita nia partidu. Tanba ne'e nia husu ba militante hotu diak liu hili partidu ida ne’ebe bele hare hetan ita, bele mos hanesan belun ka familia duké hili partidu ida ne'ebe ita hatene no koñese maibe sira rasik la koñese ita. Koordenadór partidu CASDT postu administrativu Laclubar, Mateus Soares hamutuk ho estrutura prontu ona servisu maka'as hodi hametin estrutura iha nivel postu to’o aldeia hodi kompete iha Eleisaun Parlamentár ho partidu seluk iha postu refere hodi lori CASDT nia mehi ba to’o iha 2023-2027.