top of page
Search

Istória Badak Ida Kona-Ba Partido Centro ASDT

Updated: Apr 8, 2023


Fundador no Primeiru Prezidente Centro de Acção Social-Democráta Timorense (CASDT) iha sala CNE, Kaikoli (15/12/2015)

DILI - Iha loron 2 fulan-setembru tinan 2015, partidu CENTRO ACÇÃO SOCIAL-DEMOCRÁTA TIMORENSE (Centro ASDT) estabelese ofisialmente no deklara katak sira nu'udar partidu polítiku husi Tribunál Rekursu no halo ninia Kongresu Nasionál primeiro partidu nian dahuluk iha loron 15 fulan-dezembru tinan 2015. Iha tinan 2012 nia rohan, matebian Dr. Gil da Costa Alves ne'ebé nu'udar Sekretáriu-Jerál no durante períodu badak mós nu'udar Prezidente Interinu partidu ASDT envolve an iha luta podér iha partidu ne'e nia laran no tenke rezigna-an hafoin Tribunál Rekursu hasai desizaun ida ne'ebé favorese ba parte oponente. Matebian aseita desizaun ne'e no hola parte iha partidu ne'ebé nia hadomi, maibé maske nia haketak ona, matebian sempre tuir dezenvolvimentu partidu istóriku ne'e nian husi kotuk. Matebian nia konkista ida hanesan eis Sekretáriu-Jerál husi tinan 2004 to'o 2012, ho nia matenek no liman malirin, nia konsege lori koligasaun partidu ASDT-PSD nian iha momentu ne'ebá ba vitória boot ida iha eleisaun jerál 2007, ho votu ne'ebé hetan 15.73%, aumenta 7.89% husi eleisaun anteriór. Maske nune'e, iha tinan 2007 to'o 2012, mak ikus liu partidu ASDT ne'ebé tuur iha Parlamentu Nasionál no infelizmente, iha tinan 2018, tenke deklara katak nia mate ona nu'udar partidu polítiku husi Tribunál Rekursu. Matebian ne'ebé mak sempre tuir partidu nia dezenvolvimentu, previstu tiha ona katak partidu istóriku ne'e bele monu tanba luta ba podér ne'ebé mak sempre fo-terus iha partidu nia laran. Atu nune'e, iha inísiu tinan 2015 matebian realiza no kompriende katak atu salva rikusoin orijinál ne'ebé povu Timor-Leste nian, tenke estabelese kedas partidu Centro ASDT hodi defende kedas ideolojia orijinál partidu ASDT nian, liu-liu Sosiál Demokratiku Timorense ne'ebé deklara momoos ona iha naran no estatutu partidu Centro ASDT nian.

Konselleira CASDT Aida Osorio Soares hamutuk ho estrutura nasionál.

Tuir loloos, partidu Centro ASDT estabelese duni atu proteje liman-rohan partidu ASDT nian, tanba ASDT ne'e laos de'it naran ida, maibé mós istória, filozofia no liu-liu mak ideolojia orijinál nasaun Timor-Leste nian, hanesan Sosiál Demokrátiku Timorense (SDT), no hanesan hatete ona iha estatutu partidu Centro ASDT nian, ne'ebé sempre tane ami nia eroi sira hanesan Saudoso Fransisco Xavier do Amaral, Saudoso Nicolau Lobato no herois sira seluk nu'udar pioneirus no luta-na'in SDT nian. Partidu Centro ASDT fiar mos iha SDT hanesan mata dalan ida, maske iha era globalizasaun no avansu teknolojia ohin loron nian, joven sira husi Timor-Leste bele kompete iha dinamizasaun no progresaun kompetisaun nian iha mundu no ho orgullu kaer metin ba prinsípiu hirak ne'ebé ita nia eroi sira hatudu ne'ebé tane a'as dignidade kada pessoa/umana. Hanesan nasaun sira seluk ne'ebé ho orgullu kaer sira nia ideolojia rasik iha esforsu ida atu hasai invazór sira no hamriik iha sira nia ain rasik, povu Timor-Leste no sira nia jerasaun foin sa'e sira bele sente orgullu katak ita timor oan sira bele prodús ideolojia ida úniku ne'ebé pertense ba povu Timor-Leste, hodi bele hasai kolonializmu no hamriik iha sira nia ain rasik hanesan nasaun independente ida.

Kampaña Eleisaun Parlamentar 2017 iha Ermera

Razaun tanba sá símbolu partidu sira no bandeira ne'e foun tanba tuir lei partidu polítiku sira katak laiha partidu polítiku foun ida mak bele uza naran no atributu husi partidu ne'ebé mate ona. Maibé loloos nune'e, partidu ASDT nunka konsege mate, maibé transforma an deit ba iha partidu Centro ASDT. Atu hateten sai liafuan balun husi matebian Dr. Gil da Costa Alves no Saudoso Fransisco Xavier do Amaral, katak tempu to'o ona atu hamaran povu nia matan-been no mai ita la'ós de'it atu harii asosiasaun maibé atu halo asaun, ba ita nia Sosiál Demokrátiku Timorense hodi nune'e ita labele haluha no sei kontinua luta ba SDT nu'udar jerasaun foun ba ita-nia nasaun rasik nia ideolojia. Centro ASDT mak agora, Centro ASDT mak futuru!

bottom of page