KOVALIMA - Partidu CASDT liu husi estrutura nasionál hasoru malu direita ho prezidente CASDT munisípiu Kovalima, hodi hala’o enkontru ba dahuluk iha postu administrativu Zumalai (Mape-Zumalai) iha loron Sábadu, 23 Julhu 2022. Enkontru ba dahuluk ne’e objetivu atu hala’o preparasaun ba sosializasaun no hametin estrutura hodi planu ba tomada dé pose ba estrutura munisípiu, postu administrativu, suku, to’o nivel aldeia. Tuir desizaun ne'ebé deside husi enkontru ne'e katak sosializasaun se hala’o iha fulan Setembru tinan ne’e.
Sekretáriu Jerál Partido CASDT Gally Soares Araújo iha enkontru ne’e hateten, "Partido CASDT laiha promesa maibé iha de'it kompromisu, katak ho preokupasaun ne'ebé povu Zumalai hato’o ona ba nasionál se responde wainhira povu fó fiar ba partido CASDT atinji barreira 4% liu husi votus eleisaun". Iha okaziaun ne'e mós fó hanoin katak foin-sa’e sira lalika lakon konfiansa ba partido CASDT, maske partidu ki'ik, tanba partidu ne'e nu'udar partidu joven ne'ebé nakonu ho foin-sa’e sira, tanba ne’e husu ba juventude Zumalai tomak mai ita hamutuk lori partidu CASDT ba vitoria iha eleisaun parlamentár 2023.
Primeira konselleira partido CASDT Sra. Aida Maria Osorio Soares, reafirma tan katak "Partidu CASDT kompete ona iha eleisaun parlamentár iha períodu 2017 maibe la konsege liu barreira, tan ne’e hau husu ba feto maluk sira mai ita hamutuk hakbiit no fó apoiu ba malu, liuliu ba Partidu CASDT tanba partido ne’e feto mak lidera". Konselleira akresenta tan katak CASDT hamriik hanesan partidu polítiku to’o oras ne'e seidauk promesa falsu ka bosok povu, tan ne'e hau husu ba povu Zumalai tomak liuliu ba maluk feto sira labele haluha iha 2023 vota ba CASDT.
Reprezentante militante CASDT postu Zumalai belun Almerio Gomes Pereira iha entrevista hateten "Maske seidauk simu pose maibé prontu atu servisu maka'as hodi hametin estrutura iha postu to’o aldeia hodi apoiu Partidu CASDT iha eleisaun parlamentar, ho esperansa ne'ebé hau iha, ita Zumalai avansa ho CASDT".
Comments