top of page
Search

Centro ASDT Prontu Kompete iha Eleisaun Parlamentár

Updated: Feb 4, 2022

DILI - Prezidente Partidu Centro Acção Social Democratika Timorense (Centro ASDT), Gil da Costa Alves deklara katak, partidu ninia estrutura hosi nasionál too munisípiu 13 no postu administrativu 65 ho suku too aldeia hahú kuda metin ona abut partidu nian ba militante sira hodi preparadu kompete ba festa demokrasia eleisaun parlamentár.

Prezidente Gil da Costa Alves hamutuk ho mumbru CASDT iha Laclubar.

Centro ASDT harii hosi vontade povu nian hakarak hetan reprezentasaun ba sira nian aspirasaun hodi bele rezolve dezafiu moris povu nian sai hosi situasaun nakukun ba ba moris di’ak, no kria unidade, pás ba ema tomak.

“Ami nia partidu iha munisípiu 14 too suku no aldeia metin ona, para atu kompete ba festa demokrasia eleisaun parlamentár 2017,” dehan Eis Ministru Turizmu, Gil Alves hafoin enkontru ho estrutura lideransa partidu nasionál no munisípiu 13 iha sede Centro ASDT, Aimutin - Dili, Sábadu (04/02/2017).

Partidu mai ho ninia filozofia doutrina polítika importante ‘5H’ hanesan, Hametin Unidade Nasionál, Haburas Justica Sosiál, Habelar Solidariedade, Hadomi Nasaun no Pátria, no Hamutuk Hetan Moris Di’ak.

Iha reuniaun nasionál ne’e, lider Centro ASDT diskute estratéjia polka partidu nian hodi halo evaluasaun no partilla informasaun ba malu hodi fó orientasaun ba koordenadór hotu- hotu atu hato’o sira nia hanoin no dezafiu hodi atu buka solusaun di’ak liu ba eleisaun ho perfeitu.

Durante reuniaun ne’e, Gil Alves ho estrutura diskute liu interese partidu nian liga ba interese nasionál kona-ba situasaun moris povu tomak ne’ebé trasa ona iha planu dezenvolvimentu nasionál.

“Ami diskute interese partidu nian liga mós ba interese moris povu nian oinsá maka ita bele tuur hamutuk atu rezolve problema,” nia hateten.

Lideransa estrutura nasionál too munisípiu ba daudauk ne’e kontinua halo programa konsolidasaun partidu nian hodi hato’o programa polítika partidu ba povu hodi bele hatene.

Liu hosi konsolidasaun ne’e, Centro ASDT bele koko no haree ninia forsa polítika atu kompete ho pás hamutuk ho partidu 30.

Tuir programa, Centro ASDT sei rekruta mós fiskais sira iha nivel munisípiu hodi haruka sira nia lista kandidatu ne’ebé sei haruka ba parlamentu.

Prezidente partidu ne’e aviza ba militante hotu- hotu iha eleisaun parlamentár bele hametin nafatin pás koopera ho partidu sira seluk labele hamosu konflitu ba malu.

Partidu ne’e mós loke aan ba militante partidu ne’ebé deklara afilia hosi partidu seluk tama ba Centro ASDT.

“Militante seluk tama mai ho sira nia konsensa, ami simu sira,” tenik nia.

Gil Alves dehan, Centro ASDT nu’udar partidu foun, maibé sira iha esperansa sei hetan konfiansa povu tama iha parlamentu.

Fó Apoiu Ba Prezidente Ba Tomak Entretantu iha, Eis Ministru Turizmu no Komérsiu, ne'e hatutan, sira nia parte sei konsulta ho estrutura no militante sira hodi fó apoiu ba kandidatu Prezidente Repúblika 2012-2022.

Gil dehan, sira fihir entre kandidatu PR sira ne’ebé rejista ona ba tribunál rekursu, iha kandidatu ida potensiál tebes ba sira atu fó apoiu, tanba kandidatu ne’e iha esperiénsia ukun no nu’udar lider rezisténsia ne’ebé hatene no koñese di’ak povu nia susar no terus. Hanesan sita hosi artigu ida ne 'ebé hakerek hosi ajénsia notisioza Independente, Dili - Timor-Leste.

bottom of page