top of page
Search

Centro ASDT Oras Ne'e Seidauk Iha Planu Atu Kandidatu Prezidente RDTL 2022



DILI - Partidu Centro Ação Social-Democrática Timorense (CASDT) ba Eleisaun Prezidensiál (ELPR) tinan 2022, afirma, la iha kandidatu husi partidu atu kompete iha eleisaun refere.

‘’Ami deklara katak la iha kandidatu ida husi Centro ASDT atu kompete iha eleisaun prezidensiál 2022 no to’o agora seidauk iha desijaun ida atu apoiu fali futuru kandidatu ruma ne’ebé sei mosu’’. Hateten konselleira Centro ASDT, Sra. Aida Osorio Soares, iha sede nasionál, iha loron kinta 22 Jullu 2021.

Espoza husi fundadór Centro ASDT saudoso Gil Alves ne’e, esplika liu tan, partidu nia preparasaun la’ós bá Eleisaun Prezidensiál maibé ba Eleisaun Parlamentár ne’ebé sei akontese iha tinan 2023.

‘’Agora ami servisu atu hametin tan ami nia partidu iha baze hodi prepara ba Eleisaun parlamentár 2023, maibé karik kandidatu ruma hakbesik mai ami, Centro ASDT sei koalia no tetu hamutuk hodi deside’’. Esplika fontes ne’e.

"Tanba partidu Centro ASDT mos hakarak promove espíritu nasionalista iha jerasaun foun no hakbi'it sira atu sai lider ne'ebé konfiável ba futuru nasaun Timor-Leste". Amenta tan husi Sra. Aida Osorio Soares.

Entertantu, Centro ASDT harii iha tinan 2015 no konkorre ona iha eleisaun parlamentár tinan 2017, no tuir informasaun ne’ebé G-RTV.com assesu katak partidu ne’e transforma husi partidu istóriku Assosiação Sosiál Democrática Timorense (ASDT) ne’ebé istórikamente lidera husi saudozu proklamadór Francisco Xavier do Amarál. Notísias ida ne'e sita no edita tuir notísia orijinál husi ajénsia notísia G-RTV.com husi jornalista Arménio.

Comments


bottom of page